Dómaraþing KKDÍ var haldið í gærkvöld á veitingastaðnum Horninu í Reykjavík. Nokkrar tillögur lágu fyrir þinginu, auk þess sem breytingar urðu á stjórn félagsins.

Tvær minniháttar breytingar á lögum félagsins voru samþykktar, 2. grein og 9. grein. Samþykkt var þingsályktunartillaga um að stefnt skyldi að því að fjölmenna á Evrópukeppni karla á Spáni haustið 2007, og myndi KKDÍ leggja til hliðar fjárhæð í ferðasjóð.

Lárus Ingi Magnússon.

Samþykkt var að breyta félagsgjaldinu og er það nú tvískipt. Virkir dómarar greiða 5.000 kr. árgjald, en nýliðar og óvirkir/fyrrverandi dómarar greiða árlega 2.000 krónur.

Dómarar samþykktu tillögu þess efnis að setja sér siðareglur, og er talið að það sé í fyrsta sinn sem íþróttadómarar hérlendis gera slíkt. Siðareglurnar verða aðgengilegar á KKDÍ.is innan skamms.

Gunnar Freyr Steinsson gekk úr stjórn félagsins eftir tveggja ára setu og í hans stað var kjörinn Lárus Ingi Magnússon. Gunnar Freyr var nýverið skipaður af KKÍ í dómaranefnd.

Varamennirnir Erlingur Snær Erlingsson og Halldór Geir Jensson gáfu ekki kost á sér aftur og voru kjörnir í þeirra stað Konráð Jóhann Brynjarsson og Davíð Kristján Hreiðarsson.

Stjórnin hélt sinn fyrsta fund strax að loknu þinginu og skipti með sér verkum. Kristinn Óskarsson er formaður áfram, Helgi Bragason gjaldkeri og Lárus Ingi ritari.

Stjórn KKDÍ skipaði einnig Sigmund Má Herbertsson sem fulltrúa félagsins í dómaranefnd.